Judenfrage

As „Juudefroog“ si in Öiropa ab em 18. Joorhundert d Brobleem bezäichnet worde, wo mit dr Jüüdischen Emanzipazioon entstande si. D Diskussion het um 1750 in Groossbritannie aagfange, um 1790 in dr Franzöösische Revoluzioon au z Frankriich und isch au as jüüdischi Froog (änglisch jewish question, franzöösisch la question juive) bezäichnet worde. Die Formulierig het eender dr Aaspruch vo de Juude uf e politischi Löösig vo iire Brobleem mit Nitjuude bedoont.^[1]

Vo 1860 aa häi d Gegener vo de Juude dr Begriff im Kontext vom Nazionalismus immer mee übernoo, zum die jüüdischi Minderhäit und s Juudedum uf verschidnigi Arte as e Hindernis für die allgemäini gsellschaftligi Entwigglig z beschriibe. Sit em Börsechrach vo 1873 isch dr Begriff im Käiserriich zum ene feststeende Usdruck vom zitgenössische Antisemitismus worde, wo abgstritte het, ass sich d Juude chönni integriere und assimiliere und iine understellt het, d Wältherschaft welle aasträäbe („Weltjudentum“).

Dr Nazionalsozialismus het im Aaschluss an die Dütschvölkischi Bardei Brobaganda gmacht für en „Ändlöösig vo dr Juudefroog“. Vo 1941 aa isch dä Usdruck brucht worde, zum dr Holocaust z verdusche.

1. ↑ Alex Bein: Die Judenfrage. Biographie eines Weltproblems, Deutsche Verlags-Anstalt, Stuttgart 1980, Band 2, S. 4.